Ang Katapusang Kapanahonan

Nganong Kini nga Pulong Alang man sa Iglesya?

Ang Dios nagapadayag sa Iyang katuyoan ug kabubot-on ngadto kanila nga adunay katakus sa pagsugot ug pagsinati nianang mga kadato sa Iyang himaya. Ang yano nga kahibalo sa mga kamatuoran ug mga kasinatian sa uban wala magahimo kanato nga umalambit sa Iyang mga saad. Ang "kasugoan sa makabuhi nga Espiritu diha kang Kristo Jesus" kinahanglang masinati natong tanan diha sa tinagsa-tagsa nga paagi. Ang matag usa kanato kinahanglang makaila sa Ginoo ug kinahanglang makabaton sa katakus sa pagkinabuhi ug pagsinati Kaniya diha sa usa ka matuod ug mapadayonon nga paagi. Gipanag-iya kita sa Ginoo ug dinhi niini nga paagi kita kinahanglan magalakaw, magapadayag sa Iyang tinuod nga dagway dinhi niini nga kalibutan. "Siya nga magaingon nga siya anaa Kaniya kinahanglan magakinabuhi sama sa Iyang pagkinabuhi" (1 John 2:6). Busa, sa diha nga ang Dios nagapadayag sa Iyang tuyo ug kabubut-on, Iya kining gibuhat aron kita makasugot Kaniya diha sa pagtoo nga Iya sa Dios.

Nganong kini nga pulong sa katapusang kapanahonan alang man sa iglesya, kon siya dili man moagi latas sa Dakong Kasakitan? Ang Dios nagpili sa iglesya alang sa usa ka dakong katuyoan o tawag: aron isangyaw ang maayong balita ug sa pagdala ug pagpanabot sa Iyang katuyoan ug kabubot-on ngadto sa tanang katawhan. Sa Mga Taga-Efeso 3:9-11 nagaingon, "ug sa pagpahayag ngadto sa tanang tawo kon unsa ang laraw sa tinago nga sulod sa mga katuigan gililong sa Dios nga mao ang nagbuhat sa tanang mga butang pinaagi kang Jesu-Kristo; aron nga pinaagi sa iglesya ang nagkaraiyang kinaadman sa Dios ikapahibalo karon ngadto sa mga punoan ug mga kagamhanan diha sa mga langitnong dapit, sumala sa walay katapusang tuyo nga iyang natuman diha kang Kristo Jesus nga atong Ginoo." Busa, ang iglesya mao ang gikinahanglan nga makabaton sa hingpit nga pagpanabot sa tanang mga panghitabo nga umalabot, aron nga makapanudlo ug makamantala kanila diha sa usa ka husto ug tin-aw nga paagi. Siya, nga nagahigugma sa Dios ug nagalakaw diha sa Iyang kabubot-on, makasabot ug makahibalo sa mga tinago sa Dios, sanglit masabtan man sila, dili pinaagi sa tawhanong salabutan o katakus, kondili sa pagpadayag sa Dios pinaagi sa Espiritu Santo. Si Jesus miingon, "Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios o nagsulti ba lamang ako sa kinaugalingon kong pagbulot-an" (Juan 7:17).

Ang basahon sa Pinadayag gisulat alang sa iglesya; "Si Juan nganha sa pito ka iglesya nga anaa sa lalawigan sa Asia: Ang grasya maanaa kaninyo ug ang kalinaw gikan Kaniya nga mao karon ug kaniadto ug ang umalabot..." "Ang makita mo isulat sa usa ka basahon ug ipadala kini ngadto sa pito ka iglesya nga anaa sa Asia..." "Ang adunay igdulongog, kinahanglan magapatalinghug sa sulti sa Espiritu ngadto sa mga iglesya" (Pinadayag 1:4, 11, 2:7). Busa, ang tanang bahin sa iglesya adunay kaakuhan sa pagsabot ug pagtuman niini nga pulong sa Dios. "Bulahan ang tawo nga magabasa ug ang mga magapatalinghug sa mga pulong niini nga profesiya, magatuman sa nahisulat niini; kay ang panahon haduol na." "Ug siya miingon kanako, "Kining mga pulonga kasaligan ug matuod." Ug ang Ginoo, ang Dios sa mga balaan nga mga Propeta mipadala sa iyang manolunda aron ikapakita ngadto sa iyang mga ulipon ang mga butang nga magakahitabo sa dili madugay. "Tan-awa, moabut ako sa dili madugay! Bulahan siya nga magatipig sa mga pulong sa profesiya niini nga basahon" (Pinadayag 1:3, 22:6-7).

Dugang pa niini, diha sa katapusang duha ka mga kapitulo sa Pinadayag atong makaplagan ang usa sa pinakakahibulongan ug pinakamahimayaong mga hulagway sa katapusang tuyo sa Dios, ang hingpit nga pagka-usa (kasal) sa Ginoong Jesus uban sa Iyang pangasaw-onon, ang iglesya. Uban niini nga katapusang panghitabo, ginatuman sa Dios ang Iyang tumong alang sa katawhan sumala sa Iyang gisulti diha sa Mga Taga-Efeso 1:9-12, "iyang gipabihalo kanato ang tinago mahitungod sa iyang kabubut-on, sumala sa iyang maayong tuyo nga gilaraw niya diha sa Iyang kaugalingon, nga inig-abut sa tukma nga panahon Iyang mahiusa pagtigum ang tanang mga butang diha kang Kristo, mga butang diha sa langit ug mga butang dinhi sa yuta—diha Kaniya. Diha usab Kaniya kita nakabaton ug panulondon, ingon nga gibut-an na kitang daan sumala sa katuyoan Niya nga nagpalihok sa tanang mga butang sumala sa laraw sa Iyang kabubut-on, aron kitang mga unang nanagpanoo kang Kristo magakinabuhi alang sa pagdayeg sa Iyang himaya." Unsa ka kadako ug pagkakahibulongan sa plano sa Dios alang kanato! Amen.

Next: Ang Tibuok nga Talan-awon sa Plano sa Dios