Ang Katapusang Kapanahonan

Ang Ebanghelyo ni Mateo (Kapitulo 24 & 25)

Ang basahon ni Mateo naila sa kadaghanan ingon nga "Ebanghelyo sa Gingharian." tungod kay gipahinungud ang dakong bahin sa unod niini alang sa mga mensahe o mga pulong nga may kalabutan sa gingharian sa Dios. Sama pananglitan, ang Mateo 24:14 nagaingon, "Ug kining Maayong Balita mahitungod sa gingharian igawali ngadto sa tibuok nga kalibutan ingon nga pagpamatuod ngadto sa tanang kanasuran; ug unya moabut na ang katapusan." Kini nga maayong balita nagapaila ni Kristo ingon nga mao ang Hari, "Suginli ninyo ang babayeng anak nga Sion, Tan-awa, ang imong hari nagaanhi kanimo, maaghop ug nagakabayo sa asna, ug sa nati nga anak sa asna." (Mateo 21:5). Ang tulo ka mago (maalamon nga mga tawo) nga miabot sa Jerusalem nangutana, "Hain ba ang gianak nga hari sa mga Judio? Kay nakita namo ang iyang bitoon didto sa Sidlakan, ug nanganhi kami aron sa pagsimba kaniya" (Mateo 2:2). Si Jesus gisalikway sa katawhan sa Israel, apan sa Iyang ikaduha nga pag-abot, Siya pagadawaton ingon nga ilang Hari. Iyang pabarugon ang Iyang Gingharian dinhi niini nga Yuta nga molungtad ug usa ka libo ka tuig (ang Milenyu).

Ato nang nahisgutan nga ang saad alang sa Judiyanhon nga katawhan mao ang usa ka gingharian nga ang trono niini nahimutang sa yuta sa Israel, ang gisaad ngadto sa patriarka nga si Abraham (Genesis 15:18). Diha sa Lukas 1:32-33, ang manulonda nga si Gabriel nagapahibalo kang Maria nga ang anak nga lalaki nga iyang pagasamkunon "mahimong bantugan ug pagatawgon nga Anak sa Labing Halangdon; ug kaniya igahatag sa Ginoong Dios ang trono sa iyang amahan nga si David, ug iyang pagaharian ang banay ni Jacob hangtud sa kahangturan; ug walay pagkatapus ang iyang gingharian." Ang Jeremias 30:9 nagaingon, "Hinonoa sila magaalagad kang Jehova nga ilang Dios ug kang David (Jesus) nga ilang hari nga maoy akong patindogon kanila". Adunay daghan pang uban nga mga panagna diha sa Kasulatan nga may kalabutan sa gingharian nga gisaad alang sa Israel.

Busa, sa diha nga atong basahon ang ebanghelyo ni Mateo, mahinungdanon ang pagpakaila sa mensahe ug katuyoan sa matag usa ka bahin sa kasulatan, tungod kay daghan kanila ang nagahisgot lamang alang sa katawhan sa Israel, ug dili alang sa iglesya. Ang saad alang sa iglesya dili usa ka gingharian dinhi niini nga yuta, kondili ang pagkahimong pangasaw-onon ni Kristo diha sa gingharian sa Amahan, ang bag-ong Yuta.

Diha niini nga bahin sa Ebanghelyo ni Mateo, magahatag lamang kita ug pipila ka mga hunahuna kabahin sa Kapitulo 24 ug 25, nga nagapakita ug usa ka tin-aw nga hulagway sa kahimtang sa katawhan sa Israel sa dili pa ang umalabot nga mga panghitabo nga duol na kaayo mahitabo. Una sa tanan, ang pagsakgaw o paglalin sa iglesya sa dili pa ang Dakung Kasakitan wala hisgoti niini nga mga bahin sa kasulatan. Ang mensahe diha niini nga mga kapitulo alang sa Israel ug sa laing mga nasud, sila nga magaantus sa katapusang paghukom sa Dakung Kasakitan dinhi niini nga yuta. Ang Mateo 24:14 nagaingon, "Ug kining Maayong Balita mahitungod sa gingharian igawali ngadto sa tibuok nga kalibutan ingon nga pagpamatuod ngadto sa tanang kanasuran; ug unya moabut na ang katapusan." Kining "maayong balita sa gingharian" mao ang pulong nga igamantala sa panahon sa Dakung Kasakitan; dili kini mao ang mensahe sa atong panahon karon. Ang maayong balita sa gingharian mao ang paglaum sa pagpakasulod sa milenyo kanila nga mangabuhi niana nga malisud kaayo nga kapanahonan sa mga pagsulay. Wala kita magasangyaw niini nga matang sa maayong balita karon, kondili ang pagkahimong bahin sa lawas ni Kristo, nga mao ang iglesya. Mao kini ang atong paglaum karon; usa kini ka paglaum sa himaya. Ang atong paglaum mao ang pagkahimong pangasaw-onon ni Kristo, dili ang pagsulod ngadto sa milenyo. Ang Kapitulo 7 ug 14 sa Pinadayag nagahulagway sa 144,000 ka piniling katawhan (12,000 gikan sa matag banay sa Israel), nga magasangyaw sa maayong balita sa gingharian, sa dili pa ang ikaduhang pagbalik sa Ginoo. Kini sila, kauban sa laing mga magtotoo, mao ang magatuman sa pulong nga "kining Maayong Balita mahitungod sa gingharian igawali ngadto sa tibuok nga kalibutan…ug unya moabut na ang katapusan."

Ang Mateo 24:34 nagaingon nga, "sa dili pa mahanaw kining kaliwatana, kining tanang mga butanga maga-kahitabo gayud." Kini nga kaliwatan nga gihisgutan dinhi mao ang kaliwatan sa mga ilhanan nga gihulagway diha niini nga Kapitulo 24. Hinumdumi nga ato na nga gikasulti, nga sumala sa "mata sa propeta", ang Dakung Kasakitan mao ang sunod nga panghitabo nga moabot human sa panahon ni Jesus. Mao nga "kining kaliwatana" mao unya ang sama sa kaliwatan ni Jesus, tungod kay ang kaliwatan nga gihisgutan diha sa Mateo mao ang padayon nga sumpay sa kaliwatan sa panahon ni Jesus (kinahanglan imong makita nga ang panahon ni Jesus "nahiusa" sa panahon sa Dakung Kasakitan). Ang Gingharian sa Roma nagahari sa panahon ni Jesus, ug diha sa Dakong Kasakitan sila usab unya ang mahimong maanaa sa pagbulot-an, kauban sa Antikristo, nga gipaila sa politikanhong bahin pinaagi sa Europeanhong Panagkahiusa (European Union), ug sa relihiyosong bahin pinaagi sa iglesya Katolika, ang bantugang bigaon (daghan ang atong mahisgutan mahitungod niini unya)

Usab, ang iglesya dili mahianha sa Dakung Kasakitan. Ang mga linuwas nga gihisgutan diha sa Mateo 24:13 mao kadtong magatoo kang Kristo niana nga panahon sa dagkung mga pagsulay ug molahutay hangtud sa katapusan. Sila magapanunod sa gingharian sa milenyo. Sa panahon sa Dakung Kasakitan ang iglesya tuana sa langit libot sa trono sa Dios. Mao kini ang dakung katungod (pribelihiyo) alang niadtong mga natawo pag-usab nga mga magtotoo nga nahimong bahin sa lawas ni Kristo, ang iglesya, ug nagakinabuhi ug nagalakaw nga gimandoan sa Balaang Espiritu.

Gikan sa Mateo 24:4 si Jesus nagahulagway sa mga panghitabo nga matuman sa kaulahiay nga panahon. Kini nga panahon ginganlan nga "panahon sa kasamok ni Jacob (kaguol)." Maanaa unyay dagkung mga kasakitan ug mga pag-antus, "ila kamong itugyan ngadto sa mga kasakitan, ug ipapatay kamo nila; ug pagadumtan kamo sa tanang kanasuran tungod sa akong ngalan. Ug unya daghan ang mosibug gikan sa pagtoo, ug magabudhiay ug magadumtanay ang usag usa. Ug motungha ang daghang mga mini nga profeta ug magapahisalaag sa daghan. Ug kay mosanay man ang kadautan, mobugnaw ang gugma sa kadaghanan" (Mateo 24:9-12). Wala na unyay managhigala, tungod kay ang usa magadumot ug magabudhi man sa usa, bisan diha sulod sa ilang kaugalingong pamilya. "Ug aduna unyay mga ilhanan diha sa Adlaw ug sa Bulan ug sa kabitoonan, ug diha sa yuta adunay kagul-anan sa kanasuran, nga managkalibug tungod sa dinaguok sa dagat ug sa mga balud; ang mga tawo panguyapan sa kalisang ug sa pagpaabut sa mahitabo sa kalibutan; kay mangatay-og man unya ang mga gahum sa kalangitan" (Lukas 21:25-26).

Ang Ginoong Jesus nagapasidaan nga kon ilang Makita ang maglalaglag (Antikristo) nga "magatindog sulod sa dapit nga balaan" (Mateo 24:15, 2 Mga Taga-Tesalonica 2:3-4), nga magahimo sa iyang kaugalingon ingon nga Dios, nan ang tanang katawhan palibot sa Judea pakalagiwon ngadto sa laing mga dapit, tungod kay pinakamakahahadlok nga paglutos ug kasakitan sa tanang kapanahonan nagaabot na, "Kay unya moabut ang dakung kasakitan nga ang ingon wala pa mahitabo sukad sa sinugdan sa kalibutan hangtud karon, ug dili na gayud mahitabo pa" (Mateo 24:21, tan-awa usab ang bersikulo 24:29).

Si Jesus nagahulagway sa Iyang ikaduhang pag-anhi diha sa Mateo 24:27, 30-33, 36-44. Iyang itunob ang Iyang mga tiil sa Bungtod sa mga Olivo ug makit-an Siya sa mga pumoluyo sa Jerusalem ug sa palibot nga mga dapit, "Ania karon, ang adlaw ni Jehova moabut na, …" "Ug ang Iyang mga tiil motindog niadtong adlawa sa bukid sa mga Olivo, nga anaa sa atbang sa Jerusalem, nayon sa sidlakan…" (Zacarias 14:1, 4; Pinadayag 1:7). Kining ikaduhang pag-abot maoy usa ka dayag (makita sa mata) nga pag-abot dinhi sa yuta inubanan sa daghang mga ilhanan sa pagpaila niini; dili ingon sa pagsakgaw nga diin si Jesus dili manaug dinhi sa yuta, ug kita, "pagasakgawon ngadto sa mga panganud uban kanila (ang mga binanhaw) sa pagsugat sa Ginoo diha sa kahanginan; ug sa ingon niini kita magapakig-uban na sa Ginoo sa tanang panahon" (1 Thessalonians 4:17). Wala unyay mga ilhanan sa dili pa ang pagsakgaw.

Sa Iyang ikaduhang pag-anhi, si Jesus magabuntog sa yawa ug sa iyang kasundalohan, ug unya magahukom sa mga pumoluyo sa kalibutan, aron, tapos niining mga butanga, magapabarug sa Iyang usa ka libo ka tuig (milenyo) nga paghari dinhi sa yuta, dili didto sa langit. "Ug pagasugoon Niya ang Iyang mga manolunda pinaagi sa makusog nga tingog sa trumpeta, ug ilang pagahipuson ang Iyang mga pinili gikan sa upat ka mga hangin, gikan sa usa ka tumoy sa langit ngadto sa usa" (Mateo 24:31). "Ug inig-abut na sa Anak sa Tawo diha sa iyang himaya, ug sa tanang mga manolunda uban kaniya, siya molingkod diha sa Iyang mahimayaong trono. Ug sa iyang atubangan pagatapokon ang tanang kanasuran, ug iyang pagala-inon ang usa gikan sa usa, maingon sa magbalantay sa mga hayop nga maga-lain sa mga karnero gikan sa mga kanding. Ug ang mga karnero iyang pagapinigon sa iyang too, apan ang mga kanding anha sa iyang wala. Ug ang Hari magaingon kanila diha sa iyang too, `Umari kamo, O mga dinayeg sa akong Amahan, panunda ninyo ang gingharian nga gitagana alang kaninyo sukad pa sa pagkatukod sa kalibutan" (Mateo 25:31-34).

"Apan maingon kaniadto sa mga adlaw ni Noe, mao man usab unya ang pag-abut sa Anak sa Tawo. Kay maingon nga niadtong mga adlawa sa wala pa ang lunop sila nanagpangaon ug nanag-inum, nanagpangasawa ug nanagpamana hangtud sa adlaw sa pagsulod ni Noe sa arka, ug sila walay kasayuran niini hangtud sa pag-abut sa lunop ug gianud silang tanan, maingon man usab niini ang pag-abut unya sa Anak sa Tawo" (Mateo 24:37-39). Ang katawhan karon wala magapamati sa Dios; sila mga masukihon ug magahi sa mensahe sa Dios, maingon usab sa panahon ni Noe, nga diin tanan sila nangalaglag.

Minahal nga magbabasa, hunong usa karon ug kadiyot ug pamalandong diha sa Ginoo. Andam ka ba nga mapahigawas gikan sa tanan nga mga paghukom nga magaabot sa tibuok kalibutan? Duol ug ipaubos ang imong kaugalingon atubangan sa trono sa grasya aron makadawat ka ug kaluoy ug makakaplag ug grasya nga makatabang kanimo sa panahon sa pagpanginahanglan. Ang Ginoo nagaagda sa katapusan niining kapitulo (24:44) sa pagtukaw ug pagpangandam "kay ang Anak sa Tawo moabut sa takna nga wala ninyo dahuma." Mao nga, "Bulahan kadtong ulipona nga sa pag-abut sa iyang agalon mahiabtan nga magabuhat sa ingon" (bs.46).

Next: Ang Basahon sa Pinadayag