Ang Katapusang Kapanahonan

Ang Dautang Babaye sa Basahon sa Pinadayag

"Ug ang usa sa pito ka mga manolunda nga may pito ka mga panaksan miabut ug miingon kanako, "Umari ka, ipakita ko kanimo ang hukom batok sa bantugang dautan nga babaye nga nagalingkod sa ibabaw sa daghang katubigan, kang kinsa nakighilawas ang mga hari sa yuta, ug sa kang kinsang bino sa pagkamakihilawason nangahubog ang mga nanagpuyo sa yuta." Ug iya akong gidala diha sa Espiritu ngadto sa usa ka kamingawan, ug didto nakita ko ang usa ka babaye nga nagkabayo sa usa ka mapintas nga mananap nga mapula nga nalukop sa mga ngalan nga masipad-anon, ug kini may pito ka buok ulo ug napulo ka buok sungay. Ug ang babaye nagbistig purpora ug escarlata, ug may mga dayandayan nga bulawan ug mga batong hamili ug mga mutya; sa iyang kamot may gikuptan siya nga usa ka kopa nga bulawan nga napuno sa kangil-aran ug kahugawan sa iyang pagkamakihilawason. Ug diha sa iyang agtang nahisulat ang tinago nga ngalan: "ANG TINAGO, Babilonia nga Bantugan, ang Inahan sa mga Dautan nga Babaye` ug sa mga Kangil-aran sa Yuta." Ug nakita ko ang babaye nga nahubog sa dugo sa mga balaan ug sa dugo sa mga gipamatay nga mga saksi ni Jesus. Ug sa pagkakita ko kaniya, ako nahibulong uban sa dakung katingala" (bersikulo 17:1-6).

Kining maong dautang babaye, mao ang pinakadaku nga reliheyosong kalihukan sa tibuok kalibutan, ang gitawag nga iglesya Katolica. Ang bersikulo 17 ug 18, naghatag ug detalyado o tin-aw nga paghulagway niining malimbungon nga pundok. Pipila sa mga pagsaysay mahitungod sa Bigaon mao kining mosunod:

1) Ginganlan siya ug Babayeng Dautan, Inahan sa mga Babayeng Dautan (bersikulo 17:1-5)

Kining maong ngalan naggikan sa espirituhanong pagpanapaw o pakighilawas. Ang Israel gatawag ug mananapaw sa dihang mibiya siya sa Dios ug mialagad ug laing mga dios o nagsimba ug dios-dios. Sa Ezekiel 23:37 giingon, "Kay sila nanagpanapaw, ug ang dugo anaa sa ilang mga kamot; ug uban sa ilang mga dios-dios sila nanagpanapaw; ug ang ilang mga anak nga lalake nga ilang gianak kanako gipaagi alang kanila sa kalayo, aron pagalamyon nila." Sa Pinadayag 17:2 nagaingon, "kang kinsa nakighilawas ang mga hari sa yuta, ug sa kang kinsang bino sa pagkamakihilawason nangahubog ang mga nanagpuyo sa yuta." (Tan-awa usab sa bersikulo 18:3,9). Siya usab ginganlan nga inahan sa mga dautang babaye, nagkahulugan kini nga aduna sab siyay mga "anak nga babaye" nga misunod sa iyang mga buhat ug sa iyang releheyosong pamaagi. Kining maong mga "anak nga babaye adunay mga pangulo nga nag-alagad tungod sa salapi, kadungganan, gahum, o uban pang mga butang nga wala magpasidungog sa ngalan sa Dios. "Dili tanang magaingon Kanako, "Ginoo, Ginoo", makasulod sa gingharian sa langit, kundili ang nagatuman sa kabubut-on sa Akong Amahan nga anaa sa langit." (Mateo 7:21)

Si Kristo adunay pangasaw-onon, nga mao ang iglesya, nga usa ka ulay, balaan, walay buling. Sundogon usab kini sa Anti-Kristo, aduna usab siyay pangasaw-onon, apan usa kini ka "babayeng dautan," ang iglesya Katolika.

Ang Simbahang Katoliko nagapanudlo sa pagsimba ug pag-alagad ug dios-dios nga binuhat gikan sa kahoy, puthaw, ug uban pang mga galamiton. Kining maong pundok nagpanudlo usab sa pagsimba ug pag-alagad ug laing mga binuhat, lakip na ang tawo, sama sa mga apostoles, si Maria

(nga inahan ni Jesus) ug bisan gani ang mga tawo nga ilang giila nga "Santos" o balaan. Naggamit usab sila sa gitawag ug rosaryo, alang sa "pag-ampo" ug mangaliyopo sa Dios ug bisan pa gani sa mga tawong nangamatay na.

2) Nagalingkod sa mga tubig (bersikulo 17:1)

"Ug siya miingon kanako, "Ang imong nakita nga mga tubig, diin nagalingkod ang dautang babaye, kini sila mao ang mga tawo ug ang mga panon ug ang mga kanasuran ug ang mga pinulongan." (Pinadayag 17:15, tan-awa usab sa Jeremias 51:13). Tataw kaayo nga masabot nga kining maong reliheyosong pamaagi naa sa tanang kanasuran sa tibook kalibutan, naghatag ug pagbulot-an sa mga pinakapangulo ug pangagamhanan. Ang Simbahang Katoliko lamang ang bugtong reliheyosong pundok nga giila sa tanang kanasuran "Estados" sa iyang kaugalingon (syudad sa Vatican), aduna gani siyay kaugalingong embahada sa tanang kanasuran.

3) Usa ka dakung siyudad nahimutang sa pito ka bungtod (bersikulo 17:9, 18, 18:16-19)

Ang siyudad sa Vatican nahimutang sa Roma, sentro sa Italya. Ang Roma nahimutang sa pito ka mga bungtod (dili lamang kini sulagma) ginganlan kini: Capitoline, Quirinal, Viminal, Esquiline, Caelian, Aventine ug Palatine. "Unsa bang siyudara ang susama niining bantugang siyudad?"(bersikulo 18:18). Unsa ka gamhanan ug matuod ang pulong sa Dios!

4) Naggamit kinig gikatudlo nga pamisti (bersikulo 17:4, 18:16)

"Ug ang babaye nagbistig purpora ug escarlata, ug may mga dayandayan nga bulawan ug mga batong hamili ug mga mutya; sa iyang kamot may gikuptan siya nga usa ka kopa nga bulawan nga napuno sa kangil-aran ug kahugawan sa iyang pagkamakihilawason." (bersikulo 17:4, 18:16). Kini mao ang mga bisti nga gigamit sa mga pari sa Katoliko. Naggamit usab sila ug kopa nga bulawan sa ilang mga reliheyosong kalihukan ug kulto. Ang Vatican gitukod ug gidayandayanan ug bulawan ug bililhong mga bato.

5) Nagdala ug pangalan, Ang Bantugang Babilonia (bersikulo 17:5, 18:23)

Ang babaye adunay ngalan nga nasulat sa iyang agtang nga nag-ingon: "Ang Babilonia nga Bantugan, ang Inahan sa mga dautan nga babaye ug sa mga kangil-aran sa yuta". (bersikulo 17:5). Ang pulong Babilonia naggikan sa pulong "Babel, nga nagkahulugan ug kalibog (Genesis 11:9). Sa ato pa, ang Bantugang Babilonia nagkahulugan ug dakung kalibog. Kining maong reliheyusong pundok nakalingla sa nilibo-an ka mga tawo sa tibook kalibutan. Iyang gipuno ang tibook kalibutan sa iyang mga sayop nga pagtulun-an, unya ang Dios miingon, "Gumola kamo gikan kaniya, mga katawhan ko, aron dili kamo makaapil sa iyang kasal-anan, ug aron dili kamo makaambit sa iyang mga hampak" (bersikulo 18:4).

6) Tighimog mga reliheyusong butang ug dios-dios (bersikulo 18-3, 11-13, 19)

Kining maong basahon naghulagway sa mga matang o klase sa produkto nga hinimo sa simbahang Katoliko sukad pa sa iyang sinugdan. Iyang gigamit kining maong patigayon alang sa pagpadatu sa iyang kaugalingon ug pagpakaylap sa iyang malinglahong mga doktrina. Lakip niining maong mga produkto mao ang: dios-dios (o mga larawan) ug uban pang mga butang gikan sa nagkadaiyang galamiton, mga krosipiko, kandila, ug uban pa. Dugang pa nga nakahatag ug dakung abot niining maong reliheyusong pundok mao ang patigayon sa mga ulipon ug sa mga kalag sa mga nangamatay. "Ug ang mga magpapatigayon sa yuta nanagpanghilak ug nanagminatay alang kaniya, kay wala nay mopalit sa ilang mga baligya: mga baligya nga bulawan… ug mga lawas ug kalag sa mga tawo" (bersikulo 18:11-13). Usa sa mga buluhaton niing maong mga reliheyusong katawhan mao ang pag-ampo alang sa kalag sa mga patay, susama sa buluhaton sa mga nagahimog salamangka ug espiritismo. Kabahin niining maong mga kalihukan, nanagpangayo sila ug mga salapi aron sa pagtuman niining maong mga pangamuyo.

Ang Dios adunay gitagana nga hukom niining reliheyusong pundok, "Ug unya ang Dios nahinumdom sa bantugang Babilonia, sa pagpalad-ok kaniya hangtud matiti ang tagayan sa kapintas sa Iyang kapungot" (bersikulo 16:19). Gamiton sa Dios ang Anti-Kristo ug ang iyang kasundaluhan aron sa paglumpag sa bantugang dautan nga babaye: "Ug ang napulo kabook sungay (panaghiusa sa Europa) nga imong nakita diha sa mapintas nga mananap, kini sila managdumot sa dautang babaye, ug siya ilang pagalaglagon ug pagahuboan, ug ang iyang unod ilang pagakan-on ug siya ilang pagasunogon pinaagig kalayo, kay diha sa ilang mga kasingkasing gibutang sa Dios ang pagbuhat nila sa iyang kabubut-on pinaagi sa ilang pagbaton ug usa ra ka hunahuna ug pagtugyan sa ilang harianong kagahum ngadto sa mapintas nga mananap, hangtud nga matuman ang mga pulong sa Dios." (bersikulo 17:16-17). Ang siyudad sa Vatican sa Roma pagasunugon (basaha sa Pinadayag 18:8-10, 17-18).

Next: Ang Katapusang Gubat