Ang Katapusang Kapanahonan

Ang Basahon sa Pinadayag

Ang basahon sa Pinadayag adunay pulong sa pagpanagna nga pagatumanon sa mga kaulahiang kapanahonan. Ang Dios misulti ngadto sa propeta nga si Daniel nga ang mga profesiya o panagna nga nadawat wala gipadayag ngadto kaniya tungod kay ang panahon sa katumanan niini wala pa man naabot. "Apan ikaw, oh Daniel, himoang tinago ang mga pulong, ug takpi ang basahon, hangtud sa panahon sa katapusan" (Daniel 12:4). Unya sa Daniel 12:8-9 giingon "Bisan tuod ako nakadungog, apan wala ako makasabot, unya ako miingon, "oh Ginoo ko, unsa ba ang kataposan niining mga butanga? Ug Siya miingon, "Padayon sa imong panaw, Daniel, kay ang mga pulong himoong tinago ug tinakpan hangtud sa panahon sa katapusan." Apan karon niabot na ang panahon alang sa katumanan sa maong panagna, ug gipili sa Dios ang propeta nga si Juan nga maoy magpahayag ug masudya sa pagpanabot mahitungod sa panagna, "Ayaw takpi ang mga pulong sa panagna niining maong basahon, kay ang takna haduol na" (Pinadayag 22:10)

Ang nagsulat ug ang bugtong tinubdan niining maong basahon sa "Pinadayag" mao ang Ginoong Jesu-Kristo, sa giingon sa unang bersikulo niini, "Ang pinadayag ni Jesu-Kristo, nga gihatag kaniya sa Dios aron igapadayag ngadto sa iyang mga sulugoon-- ang mga butang nga kinahanglan magakahitabo sa dili madugay." Ug usab giingon sa Mateo 24:35, "Ang langit ug ang yuta mangahanaw, apan ang akong pulong dili gayud mangahanaw." Akong gihatagan ug katino-an unsa ang giingon sa pasiuna niining maong basahon nga nag-ingon kining maong pinadayag alang "sa pagpadayag sa iyang ulipon sa mga butang nga kinahanglan magakahitabo sa dili madugay" (Pinadayag 1:1). Ang panahon niabot na. "Bulahan siya nga nagabasa ug kadtong nagpakadungog sa pulong niining maong profesiya, ug nagbaton niadtong mga butang nga gikasulat niini; kay ang panahon haduol na" (Pinadayag 1:3, 22:6-7). Pinalanggang magbabasa, ikaw usab mapanalanginan samtang ikaw nagabasa, nagpakadungog, ug nagpakabaton sa mga pulong nga gipugas sa Dios sa imong kasingkasing.

Ang kapitulo 1:19 nagasumada sa tibook basahon sa Pinadayag. Ang "mga butang nga mahitabo human nini" mao kadtong mahitabo unya sa umalabot, human sa "mga butang nga mao na," (kadtong nagakahitabo sa panahon ni Juan). Ang mata sa propeta nag-usa sa mga panghitabo sa panahon sa pagdumala sa mga Romanhon uban sa "mga butang nga magakahitabo human niini" (Lukas 23:27-31). Ang nahaunang tulo ka kapitulo sa Pinadayag naglangkob sa "mga butang nga mao na." Unya sa kapitulo 4 misugod sa pag-ingon "Saka ngari, ug ipakita ko kanimo ang kinahanglan magakahitabo tapus niini". Sugod niining bahina tanang butang gihisgutan alang na sa umaabot.

Ang pito ka iglesya nga didto sa Asia sa panahon ni Juan (sa kataposan sa unang siglo) gihulagway pinaagig pito ka lamparahan nga bulawan, nga gialirong kang Ginoong Jesus, sa dihang iyang giduaw si Juan sa isla sa Patmos (Pinadayag 1:11-13, 20). Niadtong panahona si Jesus wala pa sa langit; Siya nagpadayag ngadto kang Juan sa yuta. Ang ikaduha ug ikatulong kapitulo naghulagway sa kahimtang sa mga kaiglesyahan niadtong panahona, maong gipahinumduman sila ni Jesus sa pagbaton sa pulong sa Dios aron mahimong bahin sa madaugon nga iglesya (nga mao ang pagasakgawon ngadto sa langit), "Kay gibantayan mo man ang akong sulti sa pagkamainantuson, pagabantayan ko ikaw nga mahilikay gikan sa takna sa pagsulay nga hapit na moabot sa tibuok kalibutan, sa pagsulay sa mga nanagpuyo sa yuta. Moanha na ako sa dili madugay, kupti pag-ayo ang imong nabatonan, aron walay makaagaw sa imong purongpurong. Siya nga magamadaugon, akong pagahimoon nga haligi diha sa templo sa akong Dios; ug dili na siya magagula niini" (Pinadayag 3:10-12). "Ang magamadaugon pagatugotan ko sa paglingkod sa akong trono uban kanako, maingon nga ako usab nagmadaugon ug milingkod uban sa kong Amahan diha sa Iyang trono" (Pinadayag 3:21). "Ang adunay igdulongog , kinahanglan magpatalinghug sa sulti sa Espiritu ngadto sa mga iglesya".

Ang pagsakgaw sa iglesya mahitabo sulod sa katapusan sa Kapitulo 3 ug sa sinugdanan sa Kapitulo 4. Ang mga iglesya sa kapitulo 2 ug 3 anaa sa yuta, pipila kanila nakigbisog sa sala ug pagkamasupilon. Sa laing bahin, nakita ni Juan ang iglesya sa kapitulo 4, gihulagway pinaagi sa 24 ka mga anciano, sa hingpit nga kadaugan atubangan sa trono sa Dios. Mao kini ang iglesya nga pagakuhaon gikan sa kalibutan ngadto sa presensiya sa Dios. "Dihadiha nahisulod ako sa Espiritu, ug tan-awa, dihay usa ka trono sa langit, ug sa trono dihay naglingkod! Ug ang naglingkod niini may panagway nga morag mutya nga haspe ug cornalina, ug ang trono giliyukan sa usa ka balangaw nga morag bulok sa esmeralda. Ug ang trono gialirongan ug kaluhaag-upat ka mga trono, ug diha sa mga trono nanaglingkod ang kaluhaag-upat ka mga anciano nga sinul-obag mga maputi nga bisti, ug may mga purongpurong nga bulawan diha sa ilang mga ulo. (bersikulo 4:2-4). "Ang 24 ka mga anciano miyukbo atubangan Kaniya nga naglingkod sa trono ug misimba Kaniya nga nabuhi hangtod sa kahangtoran, ug ilang gibutang ang ilang korona atubangan sa trono nga nag-ingon: "Takos ka, O Ginoo, nga modawat sa himaya ug gahum; kay imong gibuhat tanang butang, ug pinaagi sa Imong pagbuot silang tanan namugna ug nahimo" (bersikulo 4:10-11).

Atong tan-awon ang detalye sa paghulagway niining 24 ka mga anciano.

• Nahimo silang mga hari ug mga saccerdote sa Dios ug Amahan ( bs 1:6, 5:10).
  
  
• Sila magahari sa kalibutan – bag-ong kalibutan ( bs 5:10).
  
  
• Naglingkod sila sa trono ug nagsul-ob ug korona nga bulawan sa ilang mga ulo (bs.4:4).
  
  
• Sila nagasul-ob ug puti nga mga bisti (4:4),
  
  
• Nagdala ug mga harpa ug panaksan nga bulawang puno sa insenso, nga mao ang mga pag-ampo sa mga balaan ( bs 5:8).
  
  
• Giluwas sila pinaagi sa dugo ni Kristo ( bs 5:9).
  
  
• Naggikan sila sa tanang dapit sa kalibutan (tanang kaliwatan ug dila, ug katawhan ug kanasuran) (bs. 5:9).
  
  
• Gipaklaro nga ang mga timri sa basahon nga nilukot ( kapitulo 6) gikan sa mga kamot sa Dios, wala pa maablihi. Sa laing pagkasulti, ang mga panghitabo sa Dakung Kasakitan wala pa magsugod. Ang panghitabo sa dakung kasakitan nagsugod pinaagi sa pag-abli sa unang timri.
  
  
• Ang karnero mao si Kristo ug ang mga anciano miila nga si Kristo ang bugtong takus nga makakuha sa basahon nga nilukot, ug sa pag-abli sa timri niini,; kay siya man ang gipatay ( bs. 5:9).
  
  
• Ang 24 ka mga anciano nagpabiling naglingkod sa ilang mga trono sa tibuok kapanahonan sa Dakung Kasakitan. Ang kataposang higayon nga sila gihisgutan anaa sa bersikulo 19:4, sa kataposan sa Dakung Kasakitan.
  
  
• Ang kahulugan sa 24 ka mga anciano: Ang iglesya nahimo pinaagi sa paghiusa sa mga Gentil (Efeso 2:11 – 22, Pinadayag 21:12), gipaila pinaagi sa ngalan sa 12 ka mga apostoles, ug sa mga Judeo (Roma 11:23-24, Pinadayag 21:4), gipaila pinaagi sa ngalan sa 12 ka banay.

Sumala niining tanang mga timaan, makaingon kita nga ang 24 ka mga anciano mga tawo, ug dili mga manolonda, o ni bisan unsa nga mga binuhat. Wala usab kitay makita nga basihanan sa pulong nga ang mga manolonda giluwas pinaagi sa dugo ni Kristo. Ang kamatuoran nga kining maong mga anciano nagalingkod atubangan sa trono sa Dios, sa wala pa ablihi ang mga timri, pamatood lamang nga dili gayud sila mahiagum sa dakung Kasakitan, ug gibantayan sa luwas nga dapit. Ang hugpong sa mga pulong "ug ang moabot" (bs 4:8) nagkahulugan nga niining higayona sa panan-awon ni Juan, si Jesus wala pa miabot sa kalibutan sa Iyahang ikaduhang pagbalik diin Siya makita. Kining maong dapit sa himaya atubangan sa trono sa Dios mao ang gisaad kanila nga nagmadaugon sa kalibotan: "Ang magamadaugon pagatugotan ko sa paglingkod sa akong trono uban kanako, maingon nga ako usab nagmadaugon ug milingkod uban sa akong Amahan diha sa iyang trono". ( bs 3:21). Sa maong pagkasulti, ang 24 ka mga anciano nagtimaan sa madaugon nga iglesya nga maoy pagakuhaon unya sa panahon sa pagsakgaw. Alang niining maong matuod nga mga magtotoo si Jesus miingon, "Tungod kay gibantayan mo man ang akong sulti sa pagkamainantuson, pagabantayan ko ikaw nga mahilikay gikan sa takna sa pagsulay nga hapit na moabut sa tibuok kalibutan, sa pagsulay sa mga nanagpuyo sa yuta" ( bs 3:10).

Ang kapitulo 5 naghisgot ug usa ka basahon nga nilukot, nga adunay pito ka mga timri, anaa sa mga kamot sa Dios nga Amahan. Si Jesus lamang ang bugtong takus nga magaabli niining maong nilukot nga basahon. Ang mga panghitabo nga mahitabo sa dihang ablihan ang unang timri (kapitulo 6) nagtimaan sa sinugdanan sa pito ka tuig nga dakung kasakitan, ang pinakamalisod nga panahon sa tibuok kalibutan sukad sa pagkatukod niini. Mao nga minahal ko nga magbabasa, pangandam, aron mahimo kang usa sa mga gipili sa Dios aron mahilikay sa takna sa pagsulay nga moabot gayod sa tibuok kalibutan, aron pagsulay kanila nga nagpuyo ibabaw sa yuta. Ang Dios nagapangitag magsisimba diha sa Espiritu ug kamatuoran, dili kadtong igo lamang mituman sa balaod o reliheyosong mga tulumanon.

Bisan tuod maapektohan pagmaayo ang tibook kalibutan pinaagi sa mga panghitabo sa Dakung Kasakitan, ang Israel ug ang mga kanasuran libot niini mobati gayud sa pinakamakusog nga kasamok sa mga paghukom. Ang mga bulok o kolor sa upat ka mga kabayo nga gihisgutan sa kapitulo 6 naghulagway sa nagkadaiya nga paagi o panghitabo nga matuman sa sulod sa kapanahonan sa pito katuig. Ang upat ka mga nagkabayo managsama ra ug naghulagway sa Anti-Kristo. Ang propeta nga si Daniel naghulagway sa mga pamaagi sa Anti-Kristo niini nga pagkasulti: "Ug sa kaulahiang panahon sa ilang gingharian, sa diha nga ang mga malapason managbuhat sa hingpit nga kadautan, ang usa ka hari motindog (ang Anti -kristo), nga adunay makalilisang nga panagway, nga makasabut sa mga makahahadlok nga mga laraw. Ang iyang kagahum mahimong malig-on, apan dili sa iyang kaugalingong kagahum: ug siya molumpag sa makalilisang nga paagi, ug mouswag ug magbuhat sa iyang kahimut-an, ug iyang lumpagon ang mga makusganon ug ang balaan nga katawohan. Ug gumikan sa iyang paagi iyang pauswagon ang mga paglimbong diha sa iyang kamot" ug siya magpakadaku sa iyang kaugalingon sulod sa iyang kasingkasing, ug sa ilang kakulang sa pagmatngon, daghan ang iyang mapatay; siya usab motindog batok sa principe sa mga principe; apan siya mabunggo nga walay kamot nga manghilabut. (Daniel 8:23-25).

Ang unang puti nga kabayo ( Pinadayag 6:1-2) nagtimaan sa panahon sa tulo ug tunga ka tuig sa panagdait (tan-awa ang Daniel 9:27, I Tessalonica 5:3). Niining higayona, ang Anti-Kristo mangandam pa alang sa pagbuntog sa tibuok kalibutan; mao nga siya nagaabot uban sa usa ka pana (apan walay udyong o bala) ug "usa ka korona ang gihatag ngadto kaniya, ug siya milakaw nga nagapandaug ug aron sa pagdaug. "Ang pana nga walay udyong nagkahulugan sa pagpangandam alang sa pagpakiggubat sa "tago" nga paagi.

Ang ikaduhang nagdilaab nga pulang kabayo (bs 6:3-4) sa ikaduhang timri nagkahulugan ug dugo pinaagi sa gubat; mao kini hinungdan nganong adunay gihatag kaniya nga usa ka daku nga espada. "Gikatugot kini ngadto kaniya nga nagalingkod aron sa pagkuha sa kalinaw gikan sa kalibutan, aron ang mga tawo usab magpinatyanay ang usa ug usa". "Kay sa dihang miingon sila, "Kalinaw ug kasiguruhan!" dayon kalit nga paglumpag ang moabot ngadto kanila, maingon sa pagbati sa tali-anak nga babae. Ug dili gayud sila makaikyas. (I Tessalonica 5:3, tan-awa usab ang Daniel 11:21-24). Ang ikaduhang timri nag-abli sa tinuod nga Dakung Kasakitan sa tibuok kalibutan. Gikan niining maong panahon (kataposang 3 ½ ka tuig) ang kalibutan mosinati sa pinakadaku nga mga pag-antos ug mga kasakitan nga wala pa masinati bisan pa sa sinugdan sa kapanahunan.

Ang ikatulong timri ( bs. 6:5-6) nagdala ug usa ka itom nga kabayo ug ang nagsakay niini mao ang Anti-Kristo nga naghupot ug timbangan ang iyang mga kamot aron pagsukod sa mga pagkaon. Ang itom nagkahulugan ug kamatayon tungod sa kagutom (Lamentaciones 4:8-9, 5:10 ). And kakulang sa pagkaon maoy nahimong resulta sa milabay nga mga gubat ug sa pagpatuman sa marka nga 666. Kining maong marka ipatuman sa tunga- tungang bahin sa unang pito ka tuig. "Iyang gihimo nga ang tanan, gamay ug daku, adunahan ug kabos, gawasnon ug ulipon, magadawat sa maong marka sa ilang tuong kamot ug sa ilang mga agtang, aron walay si bisan kinsa nga makapalit ug makabaligya gawas kun sila magbaton sa marka o sa ngalan sa mapintas nga mananap, o sa numero sa iyang ngalan. Ania ang kaalam. Tugoti siya nga adunay panabot sa pagkwenta sa numero sa mapintas nga mananap, kay kini numero sa usa ka tawo: ang iyang numero 666 (bs. 13:16 – 18).

Ang ika-upat nga timri ( bersikulo 6:7-8) nagdala ug dalag nga kabayo. "Ug ang ngalan sa nagsakay niini mao ang kamatayon ug ang Hades nagasunod kaniya. Ug gihatagan siya ug gahum ibabaw sa ika-upat kabahin sa kalibutan, alang sa pagpatay pinaagig espada, kagutom, kamatayon, ug pinaagi sa mga mapintas nga mananap sa kalibutan." Ang dalag (o luspad) nga bulok nagkahulugan ug kamatayon pinaagi sa tanang matang sa hampak ug kasakit (tan-awa sa Jeremias 15:3, Exekiel 5:17). Kini maoy kataposang panahon sa mga pag-antos ug kasakitan sa kalibutan.

Human sa pag-abli sa ikalimang timri ( bersikulo 6:9-11), gipakita ang hulagway sa mga magtotoo nga gipamatay tungod sa ilang pagpamatuod kang Kristo. Nipahulay sila, sa usa ka dapit sa langit, nagpaabot nga pagabanhawon sa ika-duhang pagbalik sa Ginoo.

Sa panahon sa ika-unom nga timri ( bersikulo 6:12-17) adunay modangat nga pipila ka mga katingalahang panghitabo sa kinaiyahan, ang kalibutan pagatay-ugon sa makusog nga linog, ug ang adlaw mungitngit, ang buwan mahimong daw dugo, ang matag bukid ug isla mosibog gikan sa nahimutangan niini, ug uban pang makahahadlok nga mga butang. Ang kalangitan pagalukuton daw basahong nilukot, nagpahibalo sa ikaduhang pagbalik sa Ginoo--ug si kinsa man unya ang makahimo sa pagbarog?

Next: Ang Antikristo ug ang Mini nga Propeta Sa Basahon Sa Pinadayag